ప్రజాశక్తి - చిప్పగిరి
అనాథ పిల్లలను ఆదుకోవడం కన్నా మించిన సహాయం ఇంకేది లేదని ఆలూరు మార్కెట్ యార్డు ఛైర్మన్ గుమ్మనూరు నారాయణ తెలిపారు. శుక్రవారం చిప్పగిరిలోని ఫాతిమా ఇంగ్లీష్ మీడియం స్కూల్లో ఇన్వెస్టిట్యూర్ సరమూనీ కార్యక్రమానికి ఆయన ముఖ్యఅతిథిగా హాజరయ్యారు. ఈ సందర్భంగా పాఠశాలలో 16 మంది అనాథ విద్యార్థులు చదువుతున్నారని తెలిసి ముందుగా పాఠశాల యాజమాన్యానికి ధన్యవాదాలు తెలిపారు. అనంతరం అనాథ బాలలను అక్కున చేర్చుకొని చలించి పోయారు. చిన్నతనంలోనే తల్లిదండ్రుల ప్రేమకు నోచుకోని ఆ చిన్నారులకు ఆశ్రయం కల్పించి విద్యాబుద్ధులు అందిస్తున్న పాఠశాల యాజమాన్యం ఆదరణను చూసి ప్రశంసించారు. అనాథ పిల్లల బాగోగుల కోసం అక్కడికక్కడే తక్షణ సహాయం కింద రూ.50 వేల చెక్కును పాఠశాల యాజమాన్యానికి అందజేశారు. ఈ 16 మంది అనాథ పిల్లల బాగోగుల కోసం ఇక నుంచి ప్రతేడాది తన వంతు సహాయంగా రూ.50 వేలు అందజేస్తానని హామీఇచ్చారు. పదో తరగతిలో అత్యధిక మార్కులు సాధించిన విద్యార్థినికి రూ.10 వేలు సహాయంగా అందించారు. ఈ నగదును కూడా ప్రతేడాది కొనసాగిస్తానన్నారు. ప్రధానోపాధ్యాయులు అజిత, వైసిపి కన్వీనర్ రంగస్వామి, కోకన్వీనర్ హనుమన్న, మాజీ సర్పంచి కొండా శేఖర్, అసెంబ్లీ బూత్ కన్వీనర్ రాజన్న, శ్రీధర్, సతీష్, ఆనంద్ పాల్గొన్నారు.
