క్లౌడ్ స్టోరేజ్ అనేది.. రిమోట్ సర్వర్లలో ఇంటర్నెట్లో ఫైల్లు, పత్రాలు, ఫోటోలు, వీడియోలు వంటి డిజిటల్ డేటాను నిల్వ చేయడానికి, ఎక్కడ నుంచైనా, ఎప్పుడైనా తిరిగి పొందడానికి రిమోట్ సర్వర్లను ఉపయోగిస్తారు. హార్డ్డ్రైవ్లు లేదా ఫ్లాష్డ్రైవ్లు వంటి పరికరాలలో డేటాను నిల్వ చేయడానికి బదులుగా.. ఈ వర్చువల్ స్టోరేజ్ సిస్టమ్లలో నిల్వ చేస్తారు. సాంకేతికత పెరిగిన తర్వాత తెర వెనుక జరుగుతున్న అతిపెద్ద వ్యాపారం ఇది. వినియోగదార్లకు కావాల్సిన డేటా స్టోరేజీని అద్దెకివ్వడం లేదా అద్దెకు తీసుకోవడం దీని కాన్సెప్ట్. వినియోగ దారులు తమ క్లౌడ్ స్టోరేజ్ ఖాతాలోకి లాగిన్ చేయడం ద్వారా ఇంటర్నెట్ కనెక్షన్ ఉన్న ఏదైనా పరికరం నుండి తమ నిల్వ చేసిన డేటాను యాక్సెస్ చేయవచ్చు. ప్రస్తుతం ఇంటర్నెట్ ద్వారా పొందుతున్న అనేక సేవల్లో మెజార్టీ భాగం క్లౌడ్ సేవల నుంచే అందుతున్నాయి. ప్రపంచ వ్యాప్తంగా అతిపెద్ద క్లౌడ్ సర్వీస్ అమెజాన్దే. రెండు మూడు స్థానాల్లో మైక్రోసాఫ్ట్ అజ్యూర్, గూగుల్ క్లౌడ్ ప్లాట్ఫాంలు వున్నాయి. వీటికి ప్రపంచవ్యాప్తంగా అనేక దేశాల్లో సర్వర్లు వున్నాయి. చైనా అలీబాబా క్లౌడ్.. నాలుగో స్థానంలో వుంది. ఇవేకాకుండా ఒరాకిల్, ఐబీఎం, ఓవిహెచ్, డిజిటల్ ఓషియన్, లినోడ్ వంటివి ఎంపిక చేసుకున్న పెద్దపెద్ద నగరాల్లో క్లౌడ్ సర్వీస్ను అందిస్తున్నాయి.
ప్రయోజనాలు..
- వినియోగదారులు కంప్యూటర్లు, స్మార్ట్ఫోన్లు, టాబ్లెట్లతో సహా వివిధ పరిక రాలను ఉపయోగించి ఎక్కడి నుండైనా, ఎప్పుడైనా క్లౌడ్ స్టోరేజ్లోని డేటాను యాక్సెస్ చేయవచ్చు.
- క్లౌడ్ స్టోరేజ్ సమర్థవంతమైన బ్యాకప్ సొల్యూషన్గా ఉపయోగపడుతుంది. విని యోగదారుల డేటాను వారికి సురక్షితమైన ఆఫ్సైట్ కాపీని అందిస్తుంది. ముఖ్యంగా డేటా రికవరీ కోసం, డేటా నష్టాన్ని తగ్గించడానికి క్లౌడ్ స్టోరేజ్ ఉపయోగపడుతుంది.
- వినియోగదారులు పెరుగుతున్న తమ అవసరాలను బట్టి డేటా నిల్వ చేసుకునే స్టోరేజ్ సామర్థ్యాన్ని పెంచుకోవచ్చు. తమ స్టోరేజ్ ప్లాన్లను సులభంగా అప్గ్రేడ్ చేయవచ్చు. అలాగే తమ హార్డ్ డ్రైవ్లు కొనుక్కొనే అవసరం లేకుండా అదనపు స్టోరేజ్ కొనుగోలు చేయవచ్చు.
- క్లౌడ్ నిల్వలో వున్న ఫైల్స్ను ఇతరులతో షేర్ చేసుకునే సౌలభ్యం కూడా వుంటుంది. టీమ్వర్క్, ప్రాజెక్ట్వర్క్ వంటివి ఏకకాలంలో అనేకమంది యాక్సెస్ అవడానికి అవకాశం వుంటుంది.
- క్లౌడ్ స్టోరేజ్ ప్రొవైడర్లు ఎన్క్రిప్షన్, యాక్సెస్ కంట్రోల్స్, సాధారణ డేటా బ్యాకప్లతో సహా వినియోగదారుల డేటాను రక్షించడానికి అవసరమైన అన్ని రకాల భద్రతా చర్యలు తీసుకుంటారు.
ఎదురయ్యే సమస్యలు..
- క్లౌడ్ స్టోరేజ్ అనేక ప్రయోజనాలను అందిస్తున్నప్పటికీ, దాని ద్వారా ఉత్పన్నమయ్యే అనేక సవాళ్లు, సమస్యల గురించి తెలుసుకోవడం కూడా చాలా ముఖ్యం.
- క్లౌడ్లో డేటాను నిల్వ చేయడం అంటే దానిని థర్డ్-పార్టీ ప్రొవైడర్కు అప్పగించడమే. ఇది డేటా భద్రత, గోప్యత గురించి ఆందోళనలను పెంచుతుంది. పేరున్న క్లౌడ్ స్టోరేజ్ ప్రొవైడర్లు పటిష్టమైన భద్రతా చర్యలను అమలు చేస్తున్నప్పటికీ, క్లౌడ్ ఇన్ఫ్రాస్ట్రక్చర్లో అనధికారిక యాక్సెస్, డేటా ఉల్లంఘనలు, భద్రతా లోపాల వల్ల ప్రమాదం ఎప్పుడూ ఉంటుంది. విశ్వసనీయ ప్రొవైడర్ను ఎంచుకోవడం, వారి భద్రతా ప్రోటోకాల్స్, డేటా రక్షణ పద్ధతులను తెలుసుకోవడం చాలా కీలకం.
- క్లౌడ్ స్టోరేజ్లోని డేటాను పొందాలంటే ఇంటర్నెట్ కనెక్టివిటీపై ఆధారపడాల్సిందే. ఇంటర్నెట్ కనెక్టివిటీలో నెమ్మదైన లేదా నమ్మదగని కనెక్షన్ల వంటి వాటితో సమస్యలు ఉన్నట్లయితే, అది క్లౌడ్ స్టోరేజ్ సేవల పనితీరుపై ప్రభావం చూపుతుంది. ఇంటర్నెట్ కనెక్షన్ పేలవంగా వున్నా, లేదా అంతరాయం కలుగుతున్నా... క్లౌడ్లోని ఫైల్స్ను పొందాలన్నా.. లేదా అప్లోడ్ చేయాలన్నా.. పెద్ద సవాల్గా మారుతుంది.
- సిస్టమ్ మెయింటెనెన్స్, అప్గ్రేడ్లు లేదా ఊహించని సాంకేతిక సమస్యల కారణంగా క్లౌడ్ స్టోరేజ్ సేవలకు అప్పుడప్పుడు అంతరాయం ఏర్పడొచ్చు.
- క్లౌడ్ స్టోరేజ్ ప్రొవైడర్ను మార్చాలను కున్న సమయంలో ఒక ప్రొవైడర్ నుండి మరొక ప్రొవైడర్కు డేటాను తరలించడం సవాలుగా మారుతుంది.
- క్లౌడ్ స్టోరేజీ వల్ల సౌలభ్యంతో పాటు సమస్యలూ వుంటాయి. డేటా గోప్యతపై పెద్దఎత్తున చర్చ జరుగుతున్న ఈ సమయంలో క్లౌడ్ స్టోరేజీని వాడుకోవడం, అందులో ఎలాంటి డేటాను నిల్వ చేసుకోవాలనేది నిర్ణయించుకోవడం చాలా ముఖ్యం. భద్రతా చర్యలు అందించే ప్రొవైడర్ల నుంచి మాత్రమే క్లౌడ్ సర్వీస్లను పొందాలి. లేదంటే ముఖ్యమైన డేటాను కోల్పోయే ప్రమాదం వుంటుంది.
